Кыргыз Республикасынын Депозиттерди коргоо боюнча агенттигинин өкүлдөрү — аткаруучу директор Букуев К.Дж., ошондой эле кызматкерлер Танабаев Ч.М. жана Шергазиев С.Ж. 2025-жылдын 9–10-декабрында Россия Федерациясынын Москва шаарында өткөн эл аралык иш-чараларга катышышты.

Иш-чаралар Россия Федерациясынын «Аманаттарды камсыздандыруу агенттиги» мамлекеттик корпорациясы тарабынан уюштурулуп, Евразия экономикалык бирлигине (ЕАЭБ) мүчө мамлекеттердин депозиттерди камсыздандыруу уюмдарынын өкүлдөрүн бириктирди.

Эл аралык жыйындардын негизги темалары

Иш-чаралардын алкагында төмөнкү жыйындар өткөрүлдү:

• ЕАЭБ аймагында кредиттик уюмдарды жоюу, финансылык жактан сауыктыруу жана банкроттук маселелери боюнча Эксперттик топтун кезектеги жыйыны;
• ЕАЭБге мүчө мамлекеттердин депозиттерди камсыздандыруу уюмдарын санариптештирүү багытындагы өз ара аракеттенүү боюнча Жумушчу топтун жыйыны;
• ЕАЭБге мүчө мамлекеттердин аманаттарды камсыздандыруу уюмдарынын жетекчилер кеңешинин жыйыны.

Эксперттик топтун жыйыны Россия Федерациясынын «Аманаттарды камсыздандыруу агенттиги» мамлекеттик корпорациясынын башкы директорунун милдетин аткаруучу Филатова М.В. тарабынан куттуктоо сөзү менен ачылды. Жыйындын ишин Евразия экономикалык комиссиясынын Финансылык саясат департаментинин банктык саясат бөлүмүнүн башчысы, Эксперттик топтун жетекчисинин орун басары В.В. Ковалев алып барды.

Кыргыз Республикасынын Агенттигинин баяндамалары

Жыйындын жүрүшүндө күн тартибине ылайык төмөнкү эксперттик корутундулардын долбоорлору каралып, талкууланды:

• «Аманаттарды камсыздандыруу системасында тобокелдиктерди башкаруу жана стресс-тестирлөө»
  (баяндамачы — Кыргыз Республикасынын Депозиттерди коргоо боюнча агенттиги);
• «Депозиттерди камсыздандыруучунун ишмердүүлүгүнүн үзгүлтүксүздүгүн камсыз кылуу системасы»
  (баяндамачы — Кыргыз Республикасынын Депозиттерди коргоо боюнча агенттиги);
• «Аманаттарды (депозиттерди) камсыздандыруу уюмунда процесстик башкаруу жана ички контролдоо системасы»
  (баяндамачы — Россия Федерациясынын «Аманаттарды камсыздандыруу агенттиги»).

Мындан тышкары, ЕАЭБге мүчө мамлекеттердин депозиттерди камсыздандыруу уюмдары аманаттарды камсыздандыруу системаларына коюлуучу талаптар боюнча улуттук мыйзамдарды гармонизациялоого байланыштуу макулдашылган сунуштарды бекитишти. Бул чечим ЕАЭБдин жалпы финансылык рыногун калыптандыруу жолундагы маанилүү кадам болуп саналат.

Эл аралык кызматташтык жана санариптештирүү маселелери

Жыйындардын алкагында депозиттерди камсыздандыруу чөйрөсүндөгү эл аралык документтердин жаңы редакциялары талкууланды, анын ичинде:

• Депозиттерди камсыздандыруунун негизги принциптеринин жаңы редакциясы (баяндамачы — Казакстандын депозиттерге кепилдик берүү фонду);
• Европа Биримдигинин директиваларынын жаңыланган редакциялары (баяндамачы — Россия Федерациясынын «Аманаттарды камсыздандыруу агенттиги»).

Санариптештирүү боюнча Жумушчу топтун жыйынында Кыргыз Республикасынын Депозиттерди коргоо боюнча агенттигинин өкүлдөрү жана Армения Республикасынын аманаттар боюнча ордун толтурууга кепилдик берүү фонду IADI жана EFDI уюмдарынын жарыялары тууралуу баяндамаларды сунушташты. Ошондой эле «кереге кеңеш» форматында депозиттерди камсыздандыруучулардын ишине жасалма интеллект технологияларын киргизүүнүн келечеги, электрондук төлөмдөр шартында банк-агенттердин ролу боюнча пикир алмашуу болду.

Жетекчилер кеңешинин жыйыны жана меморандумга кол коюу

Кыргыз Республикасынын Депозиттерди коргоо боюнча агенттигинин аткаруучу директору ЕАЭБге мүчө мамлекеттердин аманаттарды камсыздандыруу уюмдарынын жетекчилер кеңешинин жыйынына катышты. Жыйындын жүрүшүндө ЕАЭБ мамлекеттеринин жана Өзбекстан Республикасынын депозиттерди камсыздандыруу уюмдарынын жетекчилери банк секторундагы жана аманаттарды камсыздандыруу системаларындагы учурдагы абал боюнча маалымат алмашышты.

Ошондой эле ЕАЭБге мүчө мамлекеттердин депозиттерди камсыздандыруу уюмдары кызматташуу жөнүндө жаңы Меморандумга кол коюшту. Бул документ кызматташтыктын жаңы багыттарын аныктоого жана мындан аркы өз ара аракеттенүүнү өнүктүрүү үчүн укуктук жана уюштуруучулук негиз түзөт.

Иш-чаралардын алкагында Россия Федерациясынын «Аманаттарды камсыздандыруу агенттиги» мамлекеттик корпорациясынын өкүлдөрү депозиттерди коргоо боюнча маалыматтык порталды өркүндөтүү боюнча маалымат беришти. Аталган портал Евразия экономикалык комиссиясынын өкүлдөрү менен ЕАЭБге мүчө мамлекеттердин депозиттерге кепилдик берүү уюмдарынын ортосунда диалог жүргүзүү үчүн маанилүү аянтча болуп кызмат кылат.