Кыргыз Республикасынын Депозиттерди коргоо агенттиги кепилдик учурлары келип чыккан учурда салымчыларга компенсация төлөп берүү үчүн банк-агенттерди алдын ала тандоонун жаңы тартибин бекиткен жобонун долбоорун коомдук талкууга чыгарды.
Документтин негизги максаты — төлөмдөрдүн башталыш мөөнөтүн кыскартуу жана аманаттарды коргоо тутумунун натыйжалуулугун камсыз кылуу. Долбоорго ылайык, банкроттук же лицензиясы кайтарылып алынган учурда жарандарга акча кайтарып берүүчү банк кризис маалында эмес, алдын ала аныкталат. Алдын ала тандоо жол-жобосун үч жылда бир өткөрүү пландалууда.
Конкурска катышуу үчүн коммерциялык банк төмөнкү катуу талаптарга жооп бериши керек:
- депозиттерди коргоо тутумунун катышуучусу болуусу;
- Улуттук банктын ченемдерине ылайык жетиштүү өздүк капиталынын жана капиталдын жетиштүүлүк деңгээлинин болушу;
- акыркы 6 айдын ичинде жөнгө салуучу орган тарабынан олуттуу санкциялардын жана таасир этүү чараларынын болбошу;
- салымчылар жайгашкан аймактарды камтыган кеңири филиалдык тармакка ээ болуусу.
Конкурстун жыйынтыгы боюнча Агенттик бирден үчкө чейин банктан турган резервдик тизмени түзөт. Жеңүүчү банктар менен үч жылдык мөөнөткө келишим түзүлөт.
Долбоордо мамлекеттик банктарга тиешелүү маанилүү норма да каралган. Эгерде жеке менчик каржы институттары конкурска арыз бербесе же талаптарга жооп бербесе, Агенттик Улуттук банк менен макулдашуу аркылуу мамлекеттик үлүшү 50 пайыздан жогору болгон банкты агент катары дайындоого укуктуу. Мындай учурда мамлекеттик банк компенсация төлөө функциясын аткаруу боюнча келишим түзүүгө милдеттүү жана андан баш тартууга укугу жок.
Чыныгы кепилдик учуру (банкроттук же банк-катышуучунун лицензиясы кайтарылып алынган учур) келип чыкканда, Агенттик бир күндүн ичинде Улуттук банктан резервдик тизмедеги өнөктөш банктардын актуалдуу макамы боюнча маалымат сурайт. Жөнгө салуучу орган эки сутканын ичинде жооп бериши керек. Бул жарандарга каражаттарды кайтарып берүү процессин мүмкүн болушунча тез баштоого жана салымчылар үчүн эң даяр жана ыңгайлуу банк-агентти тандоого шарт түзөт.